الثلاثاء، 23 أبريل، 2013

اسرع طريقة مكسب التسويق الشبكي

بناءا على طلب الجماهير العريضة التعرف على حقيقة الربح من خلال التسويق الشبكي وان كانت حلال ولا حرام او شيء ناجح او فاشل قررت اني اكتب الموضوع ده عشان تبقى عارف كل حاجة عنها وما يبقالكش حجة





بص يا سيدي اولاخلينا نقول ان التسويق الشبكي له اشكال كتير لكن احنا النهاردة هنتكلم عن نموذج واحد من الشركات اللي بتستخدم التسويق الشبكي بس بالطريقة الثنائية بس مش هنقول اسمها هنسميها الشركة X 




في شركة  مكانها في هونج كونج قائمة على حاجة اسمها التسويق الشبكي الثنائي يعني اية ؟ هقولكم كمان شوية يعني اية 
المهم هي عندها منتجات زي فلتر ماية وسلسلة طاقة وكورسات ورحلات سياحية وهلم جرجر 

المهم بقى يا سيدي انها عايزة تبيع الحاجات دي فتبيعها ازاي ?

باستخدام التسويق الشبكي الثنائي 
تاني تسويق شبكي ثناني ماقولنا يعني اية بقى ؟

اصبر بس وما تتعصبش هقولك اهه التسويق الشبكي الثنائي انها تجيب حضرتك وتقنعك بالمنتج انه فظيع وهايل ورائع وكلام كتير كدة الاهم بقى انها بتقنع حضرتك انك مش بس تشتري المنتج انك كمان تدخل في عالم الشركة X وتكسب وتربح من المنتج ده من خلال انك تتكلم عنه بين اهلك ومعارفك وجيرانك واصحابك في الشغل وكدة 

طيب الموضوع لذيذ اية المشكلة بقى ?

المشكلة ان المنتج ده تمنه الاصلي 30 دولار حضرتك بقى بتدفع فيه 700 دولار 
يا نهااااااااااااااااار بلو بلاك طيب وهو انا مغفل عشان ادفع في حاجة تمنها 30 دولار المبلغ ده كله يعني تقريبا اربع خمس آلاف جنية مصري 

لا ما هي بتقنعك انك مش بتدفع تمن المنتج انت بتدفع المبلغ ده عشان يبقى ليك اكونت على الشبكة تقدر من خلالة تكسب 3000 دولار في اليوم 

قصدك في الشهر او السنة ؟

لا هم بيقولوا انك هتكسب 3000 دولار في اليوم 

طيب ازاي فهميني اكتر ؟

هنا بقى مربط الفرس يا معلم تبدأ الاول من خلال البرزنتيشن بتاعهم واللي مدته اكتر من ساعة الاول يعقدك من عيشتك وحياتك ويكرهم في شغلك ويحسسك انه زي ما قال سعد زغلول مافيش فايدة بأنها تفضل تحسبلك انت بتاخد كام في الشهر طيب وبعد سنة هتاخد كام طيب وبعد عشرة طيب وبعد عشرين سنة هيبقى دخلك كام وانت عشان توصل للوظيفة دي اصلا هتاخد كام سنة وهتصرف قد اية على كورسات وتتمرمط ومديرك يتنك عليك ويطلع عينك وبعدين تقدملك الحل السحري في الشركة X انك هتشتغل وتبقى مدير نفسك وهتقدر بمجهود بسيط تكسب مكاسب خزعبلية ويبدأ يعملك ارقام ويقنعك بيها وبعدين يرجع يفندهالك ويقدملك حلول بديلة وخيال حضرتك يشطح اكتر وريقك يجري على المكسب اكتر واكتر وتلاقي نفسك اتنقلت لدنيا تانية عملها هو في خيالك ويعيشك في الخيال ده لحد لما تدفع المبلغ 


طيب عشان توصل للمكاسب دي كلها تعمل اية ؟

ابدا مطلوب منك انك تشتري المنتج الاول وبعدين تجيب اتنين تحتيك يشتروا المنتج من خلال معارفك وبيقولك انك ممكن تجيبهم من اول اسبوع وتاخد على كل واحد 37 دولار على كل واحد وبعد كدة الاتنين هيجيبوا كل واحد اتنين تحتيهم وتاخد انت بردو على كل واحد 37 دولار وهكذا كل واحد يدخل يدخل اتنين تحتيه في الشبكة عشان حضرتك تاخد ال37 دولار وطبعا القبض بيبقى بالاسبوع على حسب كلامهم 

التسويق الشبكي 
في ناس بتعرف تشتغل الموضوع وبيجيب نتيجة حلوة معاها لكن المشكلة هنا بقى 
اولا ان حضرتك بتدفع مبلغ كبير على منتج سعره اقل بكتير من اللي بتدفعه وعشان حضرتك ادبست فبدور على حد تاني تدبسه زيك عشان انت تكسب طيب حضرتك عرفت تجيب ناس انما اللي تحتيك مش هيعرف يجيب يبقى هو كدة دفع وما استفادش اي حاجة لا منتج ولا مكسب ولا غيره 

ثانيا : المستفيد الحقيقي من الموضوع هي الشركة نفسها والناس اللي تحتيها مباشرة ويمكن الصف التاني بعديهم اما اللي بعد كدة لحد لما نوصل لقاعدة الهرم هتلاقيهم يا اما بيحاولوا يعوضوا خسارتهم يا اما بيكونوا ضحايا ولو حضرتك كنت من المستفيدين فانت هتبقى مستفيد من دم ناس تانية اضحك عليهم اشتروا الترماي 

ثالثا : الشركة X محرمة في دول كتير والمفتي في مصر اعلن ده بس هم بيحاولوا يحوروا الموضوع بتاع الفتوه ويحللوه لصالحهم الفتوة بتقول انه يبقى محرم عشان ممكن يضر بإقتصاد البلد والمشكلة كمان انه بيسيب ضحايا كتير دفعت ولا استفادت اي حاجة 

رابعا بقى يا حلو عشان اصلا توصل للطريقة المعقده اللي هم بيقولوا عليها دي هتاخد وقت كبير جدا وفي النهاية مش هتوصل للي اوهموك بيه في الاول لأن الطريقة الثنائية في التسويق الشبكي انت لازم تجيب ناس في الجانب اليمين والجانب الشمال وهم يجيبوا ناس تحتيهم بنفس المنطق يعني لو جبت واحد يمين وماجبتش شمال مش هتاخد حاجة والعكس طيب افرض جبت واحد يمين وواحد شمال وجابوا تحتهم واحد بس مش هتاخد فلوسه وهتاخد فلوس الاتنين اللي فوق بس يعني عملية معقده جدا رغم انهم بيحاولوا يعملوا لك البحر طحينة 

معلش طولت عليكم بس الموضوع بجد مهم وبقى منتشر بشكل كبير جدا 
عموما ده باختصار رؤيتي لالشركة X وغيرها كتير من الشركات اللي بتمشي بنفس المنطق وفي ناس كتير وقعت ضحية ليهم وبيندموا دلوقتي فحضرتك يمكن تستفيد بإنك تجيب ضحايا تحتك لكن صدقني المكسب الحقيقي انك تساعد الناس انها تشتغل في حاجة مفيده مش انها توصل لمكسب متخيلة انه سريع وفي النهاية يبقى حرام 


لو الموضوع عجبك ياريت ما تبخلش على واحد ممكن يبقى ضحية للموضوع ده وتنشرهاله لو ما عجبكش يا سيدي ولا كأنك قريت حاجة ولا كأني كتبت حاجة 

اللهم بلغت اللهم فاشهد 
شيرين بدر