شرح موقع pinterest

ملخص موقع pinterest
طيب بما ان في ناس سألتني كتير عن موقع #pinterest خلوني اقولكم نبذة كدة عنه
اولا ده يعتبر من اكبر المواقع برة هو موقع سوشيال اتعمل في 2011 تقريبا بس خد شهره وبقى من اكبر مواقع ال #social_media طيب هو عبارة عن اية
عارفين البومات الصور بتاعة الفيس اهو #pinterest متخصص في البومات الصور دي يعني بس اسمها Boards والبوست في بينتريست اسمه Pin 

فحضرتك بتعمل Boards كل واحد بقى على حسب مزاجك خلينا ناخد مثال صحفتي انا عاملة بورد عن مصر وبستخدم فيه الهاشتاجات #Egypt وبحط فيه اجمل صور عن مصر وطبعا بما ان معظم اللي بيشوف الموقع اجانب فهعمل صورة حلوة عن مصر بدل العك اللي بيتصدرلهم يمكن نعمل حاجة
كمان انا بهتم بالتسويق فعاملة بوردات بقى للتسويق والتسويق الإلكتروني وكدهون بقى وكمان عاملة بورد عن اجمل صور من العالم كله وبورد عن ال quotes واي حاجة ممكن تخطر على بالك ممكن تعملها بورد وتضيف ليها الصور اللي انت عايزها وتكتب في وصف الصورة هاشتاجات معبرة عن الصورة او تكتب الوصف اللي يعجبك بس الهاشتاج عشان اللي يعمل بحث عن الموضوع ده تطلع له بدري كمان ممكن تعمل بورد لفيديوهاتك اللي على اليوتيوب
طيب ده هيفيدني في اية ؟
اولا لو انت بتسوق منتج هيفيدك جدا انك تعرض صور المنتج بتاعك والعالم كله يشوفها لأنه موقع منفتح على العالم اكتر من اي موقع تواصل تاني
ثانيا : ممكن تعمل شير من الموقع او المدونة بتاعتك على بينتريست فبردو بتسوق للموقع بتاعك والعالم كله بيتابعها
ثالثا : انت ممكن تعمل سيرش على اي حاجة وتجيلك آلاف الصور والمعلومات عنها خاصة ال infographics هتلاقي كتييييييييييييييييير اوي وهتعرف معلومات رهيبة 

عايز بقى تتعرف على اخر خطوط الموضة مثلا او تشوف احدث الالكترونيات او تشوف احدث المفروشات هتلاقي كل حاجة بكثرة
طيب عايز تاخد جوله في بينتريست هتلاقي فوق على الشمال مكان للسيرش اعمل بحث عن اللي انت عايزه او جنبها هتلاقي 3 شرط فوق بعض ادخل عليها هتلاقي اقسام كتير ممكن تختار القسم اللي انت عايز تشوفه وتدخل عليه
طيب لما تعجب ببورد مثلا وعايز تفضل متابعه هتلاقي من فوق follow board او ممكن تفولو الشخص بكل بورداته بسلطاته بابا غنوجه
وبكدة كل ما الشخص او البورد ينزل فيها جديد حضرتك هتابعه كمان ممكن الناس تتابعك لو بدأت تعمل بوردات تنزل فيها حاجات بتعجبك
كفاية طولت عليكم بس اللي حابب يشوف البوردات بتاعتي اهه وانت وذوقك بقى عايز تتابع اهلا وسهلا مش عايز هحط السيخ المحمي في صرصور ودنك مش كاتبه كل الحاجات دي وفي النهاية ماتابعنيش مش اسلوب ده
بعا بهرج بس بردو هتابعني مش بمزاجك
يارب الموقع يعجبكم ويفيدكم فعلا
اه نسيت اقولكم حاجة مهمة ان الناس برة بتثق في الموقع ده ثقة كبيرة جدا لدرجة انهم ممكن ما يشتروش منتج مش موجود عنه حاجة في بينتريست
انا كدة قولت معظم الحاجات اللي عندي
وده الاكونت بتاعي للي يحب يطلع على البوردات وهتلاقوا فيها حاجات كتير تخص التسويق الالكتروني والتسويق العادي
http://www.pinterest.com/shereenbadr/boards