اية الفرق بين التسويق والبيع ؟

دايما الناس تخلط مابين التسويق والبيع 
وده بنشوفه كتير في الوظائف خاصة لما تكون شركة صغيرة ما بتكونش فاهمة اصلا الفرق بينهم يعني تبقى رايح على ان الوظيفة تسويق تلاقي نفسك مندوب مبيعات او بتشتغل في مجال البيع 




طيب اية الفرق بين التسويق والبيع ؟

بإختصار التسويق بيهتم بتوفير احتياجات العميل بإنه بيدرس العميل بتاعه كويس ويشوف هو بيدور على اية وعايز اية ويحققهاله في شكل منتج او خدمة جديده او عمل تطوير وتحديث للمنتج او الخدمة  هدفه دايما انه يكسب العميل ويحافظ عليه ويكسب من خلاله عملاء تانيين وله ادوات كتير بيستخدمها لتحقيق اهدافه 
التسويق هو اللي بيقوم بتحويل الافكار واحتياجات العميل لخدمات ومنتجات متاحة للعميل كمان بيبدأ دور التسويق قبل عمل المنتج مش بعد

اما البيع فهو اداة من ادوات التسويق بنقدر من خلالها نبيع للعميل المنتج اللي عندنا من خلال منافذ بيع سواء دائمة او مؤقته هدف البائع دائما اللي بيركز عليه انه يبيع المنتج ويربح وطبعا له ادواته اللي بيشتغل بيها
وطبعا البيع هو اللي بيحول المنتج لفلوس كمان بيكون دوره بعد عمل المنتج بعكس التسويق 

بس عشان البيع يشتغل كويس لازم يكون المراحل اللي قبل كدة ماشية مظبوط زي معرفة احتياجات العميل و ابقى عارف اية المنتج اللي ببيعه مواصفاته وفوايده سعره وده اللي بنسميه العملية التسويقية

تلخيص البيع جزء من التسويق هو اداة من ادواته لا البيع هيبقى تسويق ولا التسويق هينفع نختصره في البيع