الخميس، 1 أغسطس، 2013

تحليلي الشخصي لإعلان بيبسي وشيبسي الجديد وفيديو مفاجأة لكواليس الإعلان


نقلنالكم تعليقاتكم وتعليقات وتحليلات ناس كتير على اعلان بيبسي وشيبسي رمضان 2013 وحلينا نقول رأينا في الاعلان وطبعا ده دليل على ان الاعلان كان ناجح جدا بكل المقاييس لأنه اثار جدل كبير وتعليقات كتير منها الحقيقي ومنها البعيد خالص عن الحقيقة
كان في تعليق بيقول
لية الناس مواليد التمانينات والتسعينات اتأثروا بإعلان بيبسي وشيبسي  الجديد 




الناس اللي عندها 18 سنة أو أصغر ومبهورة بإعلان بيبسي....احب أقولوكوا ليه جيلنا عينه دمعت...اصل انتوا متعرفوش رمضان...رمضان كان تعليق الفوانيس والزينة في الشارع ليلتها...كان صوت أبوك وهو نازل على رجله يدي المسحراتي اللي فيه القسمة عشان يقول اسمك واسم إخواتك كل ليلة. كان تفصيص البلح مع ماما وصوت القرأن الكريم للشيخ عبد الباسط...كان صوت الشعراوي قبل الفطار..كان لمة العيلة حوالين طبق كنافة وطبق قطايف من غير تلفزيون...اصل مكانش عندنا غير قناتين ومسلسل واحد وحلقة فوازير وحلقة الف ليلة وليلة فكنا بنعرف نتجمع حقيقي...يعني ننزل نلعب في الشارع بالفانوس ابو شمعة وإيدنا تتلسع في تغيير الشمعة ونبقى مبسوطين...نيللي, شريهان والف ليلة وليلة على ايامنا كانوا يجننوا بس اهالينا كانوا شايفنهم مسخوا رمضان..واهالينا دلوقتي اللي عندهم إحباط من مسلسلات بتشجع العنف والضرب والقذارة الفكرية واللفظية...عمو فؤاد اللي كان بيعلمنا حاجات محترمة وقيم في كل حلقة و تتر المال والبنون وليالي الحلمية....اصل مكانش عندنا خيم رمضانية ولا أوتنجز مع ناس..كانت المودة والحب الحقيقي وصلة الرحم بتحصل بجد...كانت النفوس جميلة وراضية..كان وقفتنا ورا جدودنا في الصلاة رعب وفرحة وعظمة..كان حضن أبوك لما تصوم يوم كامل من غير غش فرحة وأمان وشعور بالنضج ولا كأنك خريج جامعة ..فرحة اخر عشر ايام عشان بننزل ندور على لبس العيد وشيلة الولاد للصاجات للفرن...ريحة روح الكعك في البيت تخليك تحس بأدمية مش طبيعية وتبقى مش قادر تستنى صوت تكبير صلاة الغيد.

دلوقتي كل ده خلاص مافيش عشان كدة بتنتشأ على اي ذكرى من الماضي نتعلق فيها 


ده كان احد التعليقات على الاعلان 

خلوني بقى اقولكم تحليلي الشخصي للاعلان بالاضافة لكل الحاجات اللي فوق دي بيبسي دايما بتستهدف شريحة الشباب في كل اعلاناتها شريحة الشباب دلوقتي اللي هم سن العشرينات والتلاتينات واللي هم مواليد التمانينات والتسعينات اللي كان في وقتها بوجي وطمطم وعمو فؤاد وفوازير نيللي وشريهان وفطوطة وغيرها فبيبسي حبت انها تجذب الشريحة دي بفكرة جديدة مبدعة الحقيقة كمان استخدام عمو فؤاد او شخصية الرائع فؤاد المهندس خلت ناس كتير تحب الاعلان اكتر نظرا ان الراجل ده اولا ما بقاش موجود ثانيا كان من اهم رموز رمضان والكل كان بيحبه 



طبعا الاعلان كان فيه شوية اخطاء كدة ما يلاحظهاش غير المتخصصين يعني مثلا وجود سفن اب مع بيبسي وشيبسي في نفس السلة في احد لقطات الاعلان واللي بررها احد مسئولي التسويق في شركة بيبسي 


  لحظه وجود سفن اب فى الاعلان كان خط لاستمراريه حمله سفن اب بعد اوعا تتضايق هنجيبك لو كنت رايق لان مبيعات الليمون انخفضت بشكل كبير على جميع مستوى الشركات الغازيه كما صرح تقرير شركه نلسن ل 2012 فبدانا بحمله اوعا تتضايق ودمج السفن فى الاعلان باعتباره تكمله كمشروب فعال لسرعه الهضم لدى معلومات الجميع وادراجه وسط لمه العائله والاكل كمشروب محفز للهضم بعد الافطار يستهدف جميع شرائح العائله مكنش خطا ولا حاجه وجوده فى الاعلان

وفي بداية الاعلان كان في اعلان لمنتج تاني (شوربة الشوفان ) في المطبخ يعني هم حبوا يعملوا زي اعلان ضمني كدة وسط الاعلان بس ما طلعتش احترافيه منهم لأنك محتاج تركز على المنتج موضوع الاعلان 

بس مسئول التسويق بشركة بيبسي كان له رأي تاني 


دى شوربه الشوفان اساسى فى رمضان فى دول الخليح الاعلان كان معمول طبق الاصل بيبسى وليز لو شفتيه لدول الخليج لان فى الخليح مفيش شبيسى ليز بس وشوربه الشوفان دى شى اساسى يوميا على طبق الافطار فنزولها امام ست البيت وقت تحضيرها الافطار كنوع تعريف الناس بها فى مصر كامكمل عذائى فى الافطار احنا اندهشنا بالمنتج ده لانه مش معروف لدى اوساط كتير عندنا فى مصر بعكس الخليج معروف عندهم بشده

طبعا في ناس كتير قالت ان شخصية عمو فؤاد 3D وفي فيديو بيوضح ده اهه 








 لكن شوفنا صورة لممثل الشخصية 



وبالبحث في الموضوعع ده اتضح انه لابس ماسك +  معالجة ب 3D 
والمفاجأة بقى ان بيبسي حبت تهادي كل اللي اعجبوا بالاعلان بتاعها ونزلت فيديو عن الميكينج اوف بتاع الاعلان او كوليس الاعلان واللي كان فيه اكتر من مفاجأة 


ولكن في النهاية الاعلان وصل لشريحته المستهدفه وحقق الهدف منه ونجح فعلا خاصة بربطة بعد كدة بعمل مسابقات وفوازير على صفحات التواصل الاجتماعي