عنوان غريب مش كدة مش مهم هتعرف دلوقتي
من كام يوم اختي ولدت باحدى المستشفيات خلاص ده حدث وعدى بس اللي ما عداش بقى علي ان في المستشفى اللي ولدت فيها لفت انتباهي حاجة غريبة جدا والكارثة اني بعتبرها حاجة غريبة
الحاجة دي ان كل الموظفين هناك بيضحكوا ووشهم بشوش على غير العادة في اي مستشفى مصرية خاصة كانت او حكومية مافيش موظف ، ممرضة ، دكتور ، عامل الا وبيضحك وما بيجريش وراك ويقولك الحلاوة يا بية ده الحقيقة استرعى انتباهي من اول لحظة دخلت فيها المستشفى من اول موظف الريسبشن لحد العاملة اللي كانت بتنضف الغرف من غير ما تبعتلها
المواعيد مظبوطة بالثانية في كل حاجة انضباط غير طبيعي ومع ذلك لا شوفت مشرف بيوجه ولا حد بيراقب الناس دي ولا حاجة فسألت حد من اللي كانوا معايا عن السبب هي لية الناس دي بتضحك ووشها بشوش كدة قالوا لي عشان مرتاحين بياخدوا اللي هم عايزنه ومافيش حاجة ضاغطة عليهم فهم مبسوطين فأنا كعميل انشكحت اوي اوي وانبسطت كدهون
دي كانت تجربتي في المستشفى
خلاصة تجربتي في محلات الملابس بقى انهم بيختاروا اكتر بنات ممكن تطفش العملاء من اول وقفتهم لطريقة كلامهم لملاحقتهم للزباين بطريقة مذرية يعني لما واحدة تقول لصاحبتها قدام العميل انت واقفة تصطادي الزباين من عند البروفة تخليك ترمي الحاجة اللي في ايدك في وشها وتمشي ده غير عصبيتهم وردهم السيء لما تسألهم عن مقاس اصغر ولا لون مختلف ده لو لقيتهم اصلا قدامك ومكانوش قاعدين ياكلوا كشري على جنب وريحة المحل بشعة او واقفة تكلم حبيبها في التليفون ومنفضة للدنيا او بتتخانق مع زميلتها مين اللي قالت للزبونة الاول لو عوزتي حاجة ابقي اندهي يا مناااااال او انها واقفة تتحايل على الموظف المسئول انه ما يخصملهاش التأخير بتاع امبارح
دول تجربتين حبيت انقلهم عشان اقول كلمة واحدة بس
اهتمامك او تقصيرك مع موظفيك هينعكس على العملاء بتوعك بالايجاب او السلب
عايز تحافظ على العملاء بتوعك حافظ على الموظفين واديهم حقهم وخليهم مبسوطين
بس خلاص
لو ليك تجربة مشابهة ايجابية او سلبية ابعتهالنا وهننشرها
