موقف حصل لزميلنا Mohamad Ansary راجل ماركتير محترم حصلت معاه مشكلة مع شركة يونيفرسال المشكلة انه اشترى سخان وباظ وجاب حد يصلحه وهو لسه في الضمان واخدوا فلوس مع انه المفروض ما يدفعش بس الراجل محترم ودفع قوم اية السخان باظ تاني المشكلة مش هنا المشكلة بقى ان خدمة العملاء في الشركة زي شركات مصرية كتير سيئة جدا فكانت النتيجة ان انصاري راجل بتاع سوشيال ميديا يعمل اية يعمل حملة على صفحة يونيفرسال واحنا كأصدقاء مش هنسيبه لوحده فقام اصدقاءنا الماركتيرز بمساندته في الحملة ضد يونيفرسال بعمل ريبوت على الصفحة وتعليقات وعمل هاشتاجات
#يونيفرسال_فاشلة
#يونيفرسال_نصابة
#حمزة_لازم_يستحمى
حمزة ده يبقى ابنه وطبعا كان في تعليقات كتير زي ياللي ساكت ساكت ليه سخانك شغال ولا اية وكتير من التعليقات الظريفة غير ان اصدقاؤهه كتبوا على صفحاتهم وبروفايلاتهم الشخصية مش بس كدة ده في ناس بدأت تتفاعل مع الموضوع من دول تانية زي المغرب والموضوع كبر
وبعد الضغط الشركة اتصلت بيه واعلنت ده على صفحتها ولكن اكيد ده مش كفاية ولازم يكون في اعتذار رسمي على الاقل ويحلوا المشكلة فعلا ولو ده حصل اكيد المتضرر هيتكلم عن ده واصحابه هينشروه كمان ويبقى كدة الشركة استفادت اكتر ما خسرت
اللطيف ان الشركة فعلا استجابت للحملة ولحقت نفسها اخيرا ونزلت اعتذار رسمي ببوست على صفحتها ده شيء كويس جدا ويحسب لها ده درس مستفاد اعزائي المشاهدين انك كشركة تحترم عملاءك وتحافظ عليهم وتخلي بالك اوي من السوشيال ميديا لأن السوشيال ميديا سلاح ذو حدين يا اما تكسبك يا اما تخسرك
خلوني بقى اقولكم على سر تسويقي بحت
موضوع انصاري ويونيفرسال كان له اكتر من فايدة لاكتر من شخص الحقيقة انا واحدة منهم ويونيفرسال نفسها هتستفيد من الموضوع ده اولا التفاعل على صفحتها زاد وهيبان ده خلال ايام كمان اللي ما يعرفش صفحتها عرفها وممكن يشارك عليها خاصة بعد ما نزلوا الاعتذار
انا بقى كتسويق استفدت اية استفدت اني اولا كتبت مقالة على مدونتي عن الموضوع ده واكيد الناس هتشوفها بالاضافة اني سوقت مقالة تانية كنت كتباها النهاردة عن كيفية المحافظة على العملاء وده بنسميه التسويق باستغلال الفرص
ماحدش بياكلها بالساهل
كيف تحافظ على عملائك وتجلب عملاء اخرين
تفتكروا الموضوع خلص على كدة لا طبعا في حد تاني استغل الموضوع بشكل عبقري و هي شركة زانوسي المنافسة لشركة يونيفرسال بعد نجاح الحملة نزلوا بوست سخان زانوسي عشان حمزة يستحمى واستخدموا نفس الهاشتاج اكيد هيبقى الافضل لو استغلوا الفرصة في وقتها مش تاني يوم
ده يعلمنا نقطة وهي انك كبراند لازم تكون متابع المنافسين بتوعك وتستغل اي فرصة وده بيفكرنا باللي حصل بين اودي و مرسيدس على تويتر في بداية 2013
وشركات تانية كتير بتعمل نفس الموضوع انها تتابع البراند المنافس ليها وتستغل الفرصة مع اول سقطة للبراند ده على السوشيال ميديا وبيكون رد الفعل قوي جدا
الموضوع هيفضل محدث باستمرار لأنه واضح ان كل لحظة في جديد وكل ده عشان خاطر عيون حمزة اللي لازم يستحمى
