الخميس، 6 مارس، 2014

سامسونج والاوسكار وحرب تويتر

التسويق بإستغلال الأحداث طبعا ده نوع من انواع التسويق القوي جدا وده بيكون بإستغلال حدث ما لصالحك يعني مباراة ، حفلة ، برنامج كبير
سامسونج فكرت انها تستغل حفلة الاوسكار السنة دي 2014 بأنها تعمل دعاية لمنتجاتها خاصة  Galaxy s5 , Note 3 فقامت بعمل حملة الصببح You Need To See This وبالليل  اثناء فواصل الحفلة   كانت الحملة الدعائية بتاعتها واللي شافها ملايين الناس في العالم في التليفزيون و ملايين على تويتر ومواقع التواصل الاجتماعي الاخرى وكلها صور بنوت 3 جالكسي اس 5


  سامسونج دفعت عشرين مليون دولار عشان الحملة دي بالفعل الحملة نجحت نجاح تخطى حواجز المعقول خاصة على السوشيال ميديا لما Ellen Degeneres من اشهر مذيعي برامج التوك شو الكوميدية واللي عندها اكتر من 27 مليون متابع على تويتر قامت بعمل تويته كسرت بيها رقم اشهر تويته على تويتر في الارقام من حيث الريتويت والردود 

Ellen Degeneres Tweet
عدد الريتويت للتويته دي لوقت كتابة المقالة كان 3.290.984 وعدد التفضيل قارب على الاثنين مليون غير الردود واصبحت اشهر تويته واحتلت المركز الاول بعد ما كانت تويته اوباما بعد نجاحه في الفترة التانية في 2012 لما كتب اربع سنين اخرى وصورة مع زوجته هي الاشهر 
تويته اوباما الشهرية 2012


 بالمناسبة موقع تويتر تاني يوم اعلن ان التويته  بتاعة Ellen Degeneres   هنجت الموقع من الاقبال على عمل الريتويت ليها ونزل على مدونته بعض الاحصائيات للتويته  قال انها جلبت 2.4 مليون اعادة تغريد وتمت المشاهدة اكتر من 8.1 مليون مرة بالاضافة انه في اكتر من 13711 صفحة على الويب اتكلمت عنها


اللطيف بقى ان في ناس حبت تستغل فرصة نجاح سامسونج وتنكد عليهم زي نوكيا اللي قامت بعمل تويته لصورة ضبابية لإيلين ونشروها على حسابهم الخاص 
Nokia Tweet
ودي تحسها تويته غلاوية ما قدرتش تستغل نوكيا في وجهة نظري النجاح بتاع سامسونج بشكل لائق وكأنها واقفة لها بالمرصاد 

لكن في منافسين تانيين استغلوا الموضوع ببراعة زي LG استغلت الموضوع بطريقة لطيفة على حسابها على تويتر 
LG


و زي Lenovo اللي حاولت تبرز ميزة في الجهاز بتاعها مش موجوده في جهاز سامسونج واللي كتبتها ايلين في التويته لو ان اذرع برادلي اطول عشان يصور كل الناس في الصورة دي ومايخرجش حد برا الكادر 
Lenovo
طبعا كل المنافسين حاولوا يستغلوا الموضوع لصالحهم ولكن مافيش حد قدر يغطي على النجاح اللي حققته سامسونج لا بالغل زي نوكيا ولا بالترويج لميزات مش موجوده في سامسونج زي لينوفو وال جي 
لو تفتكروا اتكلمنا عن موضوع التسويق باستغلال الفرص ده في تدوينه سابقة بإقتناص زانوسي فرصة سقوط يونيفرسال في مشكلة كانت على هاشتاج #حمزة_لازم_يستحمى