الأحد، 22 يونيو، 2014

سوشيال ميديا بطعم الطبيخ

امبارح كان ايفنت SOCIAL MEDIA DAY ‪#‎SMDayEgypt‬
   اللي منظماه mashable  طبعا دي السنة التانية للحدث في مصر وزي مانتوا عارفين كل ايفنت فيه السلبيات والايجابيات ومن الطبيعي والبديهي انك كصاحب ايفنت تكون حابب تعرف اية هي سلبياتك عشان تتفاداها بعد كدة 

social media day

لكن اللي حصل كالآتي : 
الناس اللي حضرت كان لها تعليقات سلبية وكان من الطبيعي ان الناس تتعامل مع التعليقات دي بإحترافية عالية بما انهم ناس بتوع سوشيال ميديا ومجمعين اجمد ناس في السوشيال ميديا طب كانوا ياخدوا بنصايحهم ، يستشيروهم ، يسألوا نتصرف ازاي مع التعليقات السلبية 
لكن اللي حصل انهم من اول اليوم وهم بيمسحوا اي تعليق سلبي او نقد سواء بقى للتنظيم او للسبيكرز ماشي قولنا مش هنعلق لهم المشنقة عشان في سلبيات ولكن تعامل بقى مع اللي بيحصل بذوق وارضي الناس اللي جتلك ودفعت لك فلوس والامر ما وصلش لكدة وبس ولكن كمان بدأوا يعملوا بان لبعض الناس اللي بتتكلم وبتنتقد وقفلوا امكانية وضع بوستات على الايفنت اية ده طب ما تكهربوا الصفحة بقى احسن 

طبعا بعد اللي حصل حتى لو كان في ميزات في اليوم او شيء ايجابي اتمسح بأستيكة والناس هتركز على الشيء السلبي واللي كان نفسه بقى يقول حاجة هيقولها بصراحة ماكانش ينفع التعامل بالطريقة دي خالص كان ممكن بمنتهى الذكاء تكسب كل الناس دي في صفك بإعتذار ووعد ان ده مش هيتكرر السنة الجاية مثلا اهه حاجة بسيطة جدا ولكن الكبر في السوشيال ميديا بيودي في داهية 
تفتكروا الايفنت ده لو اتعمل السنة الجاية في حد هيروح 
استحالة طبعا 
يبقى انت حضرتك ضريت نفسك وكل اللي عملته شوية فلوس خدتهم من الناس على شوية فلوس من المنظمين وشكرا 


لما يكون حدث بيجمع حوالي 500 Marketer  والحدث ده هيتكلم عن ال #socialmedia  والقائمين على التنظيم ما يعرفوش ابجديات السوشيال ميديا ويتعاملوا معاها بشيء من الغشومية  لأنك باختصار بتستفز الناس دي والناس دي ما بتصدق بصراحة ما بيسكتوش ولا بيتبل في بؤهم فوله  بتوع تسويق بقى وفاهمين اهمية السوشيال ميديا كويس 
يعني لو بحسبة بسيطة قولنا ان نص الخمسماية كانوا مضايقين ونصهم اتكلم عن السوشيال ميديا للناس اللي متابعينهم يبقى البراند ده خلاص ادمر وطبعا كالعادة اتعمل هاشتاج للي نفسه يتكلم بحرية عشان ماحدش يعمله بان ولا يحذف تعليقه ‫#‏سوشيال_ميديا_بطعم_البطيخ‬ قولي بقى يا صاحب البراند هتسيطر ازاي على حاجة زي دي هتقدر تمنع الناس انها تتكلم على هاشتاج هيشوفه ناس اضعاف اللي حضروا الايفنت بتاعك 

للأسف الايفنت ده ضرب نفسه بنفسه وده بسبب قوة السوشيال ميديا اللي هم دعوا الناس ليها وهم للاسف مش عارفين يتعاملوا معاها باحترافية 

 وبالمناسبة ده رأيي الشخصي في اليوم متصور فيديو  في نفس يوم الايفنت وكمان كتبت بوستات بذكر فيها ايجابيات اليوم بس زي ما قولت ان حاجة سلبية زي اللي حصلت دي هتضيع للاسف ايجابيات كتير اوي كانت موجوده والناس مش هتفتكر غير السلبيات


عن البوست اللي كتبته
smdayegypt
حضرت اليوم واستمتعت جدا بغض النظر ان كان في شوية سلبيات بس ده عادي وارد انه يحصل مش هنقتل الناس زي ما انا شايفة في البوستات طبعا احترم اراء كل الناس بس انا عايزة اقول حاجة كلنا بشر ووارد نسبة الخطأ المهم اننا ما نكررش الغلط تاني ونحسن من نفسنا وما ننكرش ان تنظيم يوم زي ده محتاج مجهود شهور قبلها فبلاش نحبط الناس عشان احنا ما نعرفش الكواليس كانت عاملة ازاي
اليوم ما كانش سيء بالدرجة بالعكس كان في جوانب ايجابية كتير بس لو احنا حبنا نشوفها هنشوفها اما لو حبينا نشوف السلبيات بس مش هنشوف غيرها
كنت مبسوطة بكم ال Marketers الموجودين شوفت ناس كتير واتكلمت مع ناس اكتر تبادلنا المعلومات والخبرات في اوقات كتير وشوفت ناس شبة عملت بيزنس
اتعودت اني مش لازم اطلع بمعلومات بس من اي ايفنت عشان اكون مستفيدة لأن اكيد في حاجات تانية ممكن تفيد اكتر من المعلومة لأن المعلومات مغرقة الدنيا
سعيدة بكل الناس اللي شوفتها واتعرفتها عليها النهاردة وان شاء الله اشوفكم تاني قريب
ملحوظة : انا مش من المنظمين ولا اعرف حد منهم حتى وفي حاجات ماعجبتنيش في اليوم بس انا كنت رايحة استمتع واستفيد بشكل او بأخر وحققت هدفي

برنامج اليوم الجزء المميز فيه :
اول فقرة بتاعة هيثم يحيى اتكلم فيها عن نقاط محددة عن اليوتيوب تقدر من خلالها تحسن من اداء القناة بتاعتك وتزود في عدد مشاهدات الفيديوهات ودي كانت من الفقرات الرائعة في اليوم

كمان فقرة باسم الهادي عن السوشيال ميديا ستراتيجي من الفقرات المميزة
نهال هاشم كانت فقرتها صغيرة اوي ما لحقناش نستمتع بيها ان شاء الله المرة الجاية يبقى معاها وقت اطول وتمتعنا وتفيدنا بخبراتها الكبيرة في المجال

اما جزء البراند مع ايمن الدمياط فدي كانت من اروع الفقرات لأنه استخدم فيها وسائل ايضاحية مبدعة جدا
الجزء بتاع شلبي كان الاكثر في التفاعل بس كان عنده مشكلة انه اتكلم في السياسة وطبعا ده عمل مشكلة عن المنظمين وطلبوا منه ما يتكلمش في السياسة والناس كانت مستاءة من ده
فقرة المواطن المصري كانت هايلة جدا وكان متوقعع طبعا ان ابلة فاهيتا ما تجيش عشان ما تحرقش نفسها
ماحضرتش لشارموفرز لأن خدوا وقت طويل في انهم يسخنوا

دي اهم الفقرات في اليوم كله الحقيقة 



بس خلاص 
Shereen Badr