ازاي تتقدم لعروسة على طريقة ال Marketers -1

انا بدور على عروسة ازاي الماركيتنج ممكن يفيدني ؟
سؤال جالي على ask وعجبني فخليني اجاوبه هنا

ازاي تتقدم لعروسة على طريقة ال Marketers
بص يا سيدي اول حاجة انت لازم تحدد هدفك الاول انت عايز اية بالظبط عايز العروسة دي شكل ومنظر من برة ولا زوجة تعيش وتعمر وتبقى ام اولادك 

بعد كدة ابدأ شوف انت امكانياتك المادية مثلا تسمح بالزواج اصلا ولا لا وابدأ اشتغل على ان يكون معاك اللي تقدر تنافس بيه الخطاب التانيين ماهو انت مش لوحدك في الكون او على الاقل يبقى عندك اللي مش عند حد تاني ( قلب كبير ، طيب ، حنين
الحاجات اللي ما بقتش موجود دي 

شوف الخطاب التانيين اية اللي بيميزهم وممكن يخليهم يتفوقوا عليك وحاول انك تتفوق عليهم بأنك تحسن من مستواك سواء بقى الاجتماعي ، المادي ، الثقافي على حسب كل حالة

نيجي بقى للخطوة المهمة وهي تحديد العروسة المناسبة ليك ابدأ شوف دائرة معارفك ، قرايبك ، اصحابك ، معارف معارفك ، صحاب صحابك .... وابدأ تفلترهم لحد لما تستقر على البنت صاحبة القسمة و النصيب

دلوقتي بقى جه دور انك تتقدم يا بطل لا استنى الاول ابدأ يا حلو تجمع معلومات هي مين و مين اهلها ميولهم واهواءهم يعني باباها بيشجع اي نادي مثلا مانشستر ولا تشيلسي الحاجات اللطيفة دي وخليك معاه على نفس الموجة ماهو اللي في ايده المفاتيح بتاعة قلبك
وطبعا تعرف هي اية اهتماماتها بتحب اية وبتكره اية وابدأ اهتم بيه عشان تقدر تخطب ودها وتسوق لها نفسك بطريقة ترضيها
وماتنساش ان كل بنت جواها يسرية عايزة ورد يا ابراهيم

Add caption

 ومهما كانت البنت لها شخصيتها وقوتها مش هتكون عايزة اكتر من اهتمام وكلمة حلوة هتكسبها و هتشيلك في عنيها
وياسلام بقى لو قدرت تتعامل معاها على انها عميل وحاولت تكسبها بكل الطرق الممكنة هتكسب ولاءها وتحافظ عليها والكلام ده يستمر بعد الجواز وهي دي خدمة ما بعد البيع

وبالرفاء والبنين   وماتنسوش تعزومني على الفرح 
Shereen Badr