اعادة الاستهداف بالاعلانات

احنا متراقبين ولا اية ؟!

ذات مومنت لما تدخل موقع ecommerce مثلا تدور على منتج او تتفرج على منتجات او موقع بيقدم خدمات اونلاين وتخرج منه من غير ما تشتري وتروح داخل على الفيسبوك ، يوتيوب ... وتلاقي قدامك نفس ذات الموقع اللي كنت لسة عليه او المنتج اللي كنت بتبحث عنه من شوية اعلانه قدامك على كتير من المواقع اللي دخلت عليها بعد كدة ، الموقف ده اتكرر مع ناس كتير وكانوا مستغربين 

اكيد مش صدفة ؟

طبعا هي مش صدفة دي حاجة في ال Digital Marketing  اسمها remarketing  وفي رواية اخرى retargeting وهي اعادة الاستهداف ودي وسيلة بيقدر بيها المعلن انه يتتبع كل واحد دخل على الموقع بتاعه وما اخدش الاكشن المطلوب منه زي انه يشتري مثلا من الموقع او يعمل داونلود لابلكيشن معين فيظهرله اعلان الموقع ده في الاماكن اللي زارها بعد الموقع 

وده بيتم من خلال اعلانات جوجل ادوردز ، اعلانات فيسبوك على سبيل المثال انت كمعلن بتقدر تحدد انك عايز تظهر بإعلانك للناس اللي دخلت عندك على الموقع ومازارتش صفحة معينه فتظهر لها اعلانك تاني ربما ترجع للموقع مرة تانية 

الهدف منها : انها تترجت نفس الناس اللي دخلوا الموقع وما اتشتروش زي ماقولنا وه ممكن يكون لأسباب كتير منها مثلا حصل تشويش عليه فخرج ومارجعش تاني ، ان الكهربا قطعت ( طبعا الكلام ده مش عندنا في مصر خالص ) ان حد اتصل بيه او جاله حد وانشغل ونسي موضوع الموقع كل دي حاجات ممكن تحصل وغيرها كتير فالمعلن بيرجع يفكرك بأنك كنت بتدور على الحاجة دي او دخلت على الموقع ده تبحث عن منتج معين او خدمة معينه وما اشترتهاش 

طب هو بيعرف منين انك ما اشترتش الخدمة او المنتج ؟

لما بتشتري منتج او خدمة اونلاين بيوصلك بعد اتمام عملية الشراء لصفحة معينه بتأكد انه استلم طلبك لشراء المنتج مثلا وبيشكرك على انك طلبت الخدمة او المنتج ده المهم بقى انك لو دخلت الموقع وماوصلتش للصفحة دي هو بيعرف  فاللي يوصل للصفحة الاخيرة اللي هو محددها تمام كدة انت اتممت عمليه الشراء ومافيش داعي يظهرلك اعلانه 

اما لو ما دخلتش على الصفحة فبيعرف  ان اليوزر ما وصلش للصفحة وبالتالي ما اشتراش ويبقى الافضل اني اظهرله الاعلان بما انه دخل على الموقع فهو ممكن يكون بنسبة كبيرة مهتم انه يشتري 

طب الموضوع ده بيجيب نتيجة ولا بنرمي فلوس على الارض ؟

اغلب اللي جربوا الطريقة دي نسبة كبيرة منهم بتقول انها بتجيب نتيجة ايجابية وان ناس كتير فعلا بتشتري لأنها الشريحة المستهدفة والمهتمة فعلا بالمنتج او الخدمة دي 

طبعا لو دخلت على امازون ، سوق ، جوميا .... اي موقع ecommerce وخرجت من غير ما تشتري حاجة غالبا ما هتلاقي اعلانات المنتج اللي كنت بتبحث عنه قدامك في مواقع تانية عشان يحفزك تشتري المنتج ده 

وهو ده سبب انك تلاقي الاعلانات دي قدامك بعد ما تخرج من الموقع الموضوع لا هو سحر ولا شعوذه ده تسويق مبني على اسس سليمة والله الموفق والمستعان


وبما ان فوق كل ذي علم عليم وفي ناس متخصصة اكتر مني في الجزئية دي فكان في اضافة مهمة من استاذ محمد طه 

في نقطتين
اولا مفيش حد بيقول remarketing غير جووجل الباقي retargeting.
..
من غير ثانيا....

انتي ممكن تعملي ال كلمتين اللي فاتوا دول بقي بكذا طريقه. في شركات كتير بتعمل الخدمة دي اوتوماتيك ليكي من product feed بتاعك. اشهرهم... Vizury و adroll و creitio ده لو عندك e-commerce website
لو معندكيش google remarketing بتعمل اللي عليها و زياده اعملي انتي بس remarketing list و ووري الناس اللي عاوزة توريهولهم.
Remarketing list معناها انك تحددي انهي نوع من الناس عاوزة توريه ايه يعني واحد مشتراش عاوزاه يشتري طب واحد اشتري يبقي عاوزاه يشوف اعلان لما بعد الشراء اكسسوارات خدمات ضمان خدمه اضافيه. انتي و شوقك.

الطريقتين بالكوكيز بس الاولي ديناميك ريماركتنج و التانيه ريماركتنج ليست.

و الله أعلم.

لو عايز تعرف تفاصيل اكتر عن اعادة الاستهداف من خلال الفيسبوك ممكن تشوف التفاصي لمن هنا
https://www.facebook.com/business/a/online-sales/custom-audiences-website

تحياتي ليكم 

شيرين بدر