ناس كتير بتكتب موضوعات رائعة على مواقعها ولكن عندها مشكلة انها غير مهتمة بتهيئة المحتوى الرائع ده لمحركات البحث فممكن يتأخر في الترتيب خلونا نستعرض اهم خطوات ممكن تساعدنا اننا نرانك بالمحتوى بتاعنا في محركات البحث طبعا بعد ما يكون الاساس انك عامل محتوى حصري وجيد ومافيش منه
 |
| ازاي تكتب تدوينه لموقعك |
- استخدم long tail keywords
حاول تستخدم كلمات مفتاحية long tail عليها نسبة بحث عالية او متوسطة ويكون المنافسة عليها مش عالية اوي ، ابعد عن الكلمات المفتاحية ال broad يعني اية يعني مثلا لو هنقارن بين كلمة "سيارات" دي كلمة broad نسبة البحث عليها عالية اوي بس كمان المنافسة عالية كمان خليك محدد عشان الترافيك اللي هيجيلك يحقق الهدف اللي انت عايزة يعني هتخليها مثلا "سيارات مستعملة للبيع "
- العنوان :
خلي العنوان يكون ال من 70 characters وتكون مستخدم فيه ال long tail keyword اللي انت حددتها في البداية
كمان خلي العنوان جذاب باستخدام كلمات التفضيل زي افضل ، اهم ، اسرع ....
استخدم فيه ارقام زي عشر خطوات لعمل اي حاجة ....
استخدم صيغة السؤال زي : ازاي احترف التسويق الالكتروني ؟
ولو مش عارف تجيب افكار شوف الاداة دي هتساعدك بأفكار للعنوان المقالة بتاعتك اكتب الكلمة وهي هتقولك مجموعة افكار اختار اللي يعجبك
- التدوينه نفسها :
استخدم فيها الكلمات المفتاحية اللي عايز تركز عليها وكمان كلمات يكون لها علاقة بيها يعني لو بتتكلم مثلا عن ازاي تجري مقابلة عمل خلي كلمات زي cv , interview , hr موجوده جوه المقالة لأن جوجل بقى يفهم علاقة الكلمة بالمحتوى
اما عن تكرار الكلمة المفتاحية كام مرة في المقالة في اراء كتير بأعداد اكتر سيبك من كل ده واكتب محتوى متناسق مش مهم تكرر الكلمة قد اية المهم انها تكون مناسبة للمحتوى ما تعملش حشو وخلاص للكلمات استخدمها بشكل مناسب
ال URL :
طبعا ابعد عن الدايناميك في ال URL وحاول تستخدم URL انت اللي تكتبهه بنفسك وتضمن فيه الكلمة المفتاحية بتاعتك ومايكونش طويل و يكون بيعبر عن محتوى المقالة او بمعنى ادق استخدم العنوان بتاع المقالة في الURL
ال Meta Description
وهي وصف بيتكتب عن محتوى المقالة بيظهر في محركات البحث يفضل يكون اقل من 156 characters وما تكررش الكلمات المفتاحية فيه اكتر من مرة وخليه يجذب القاريء ويشجعه انه يدخل ويقرأ المقالة بتاعتك يعني بتقوله لية تدخل مدونتي او موقعي عن اي موقع تاني
تهيئة الصور :
مهم انك ترفق صور جذابة بالموضوع بتاعك وتكون معبره عنه بس مهم كمان انك تعمل تسمية للصورة كعنوان ليها عشان تساعد محركات البحث تفهم محتوى الصورة بتاعتك وتظهره ، كمان النص البديل او ال alt text علشان لو الموقع بيحمل الصور ببطء مع المستخدم يظهر ال alt text مكان الصورة ويفهم منها المستخدم محتوى الصورة
الروابط الداخلية :
طبعا الروابط الداخلية مهمة جدا لمحركات البحث كمان بتساعد المستخدم انه يكتشف مواضيع ليها علاقة بالتدوينه او بالموضوع بتاعك وده بيخيليه يفضل فترة اطول في موقعك ويشوف عدد صفحات اكبر
تنويع المحتوى :
نوع في الموضوع بتاعك باستخدام الصور ، الانفوجرافيكس ، الفيديو ، العروض وغيرها من انواع المحتوى اللي بتستحوذ على اهتمام المستخدم وتخليه مبسوط من موقعك
دي بعض الحاجات اللي ممكن تساعدك تظهر بمحتواك في محركات البحث في النتايج الاولى في حاجات تانية اكيد هحاول اتكلم عنهم عشان كدة طولت عليكم بصراحة وشكلكم زهقتوا مني :D
يالا نقول الهاشتاج العظيم بتاعي #عايز_تنجح_ساعد_غيرك_ينجح
تحياتي
Shereen Badr
