الفوبيا من الانجليزي
بما ان ناس كتير بعتت تسألني عن موضوع عدم اتقان اللغة الانجليزية وتأثير ده على سوق العمل بشكل عام وعلى مجال التسويق وال online marketing بشكل خاص خلوني احكي لكم حكاية صغننه عن معاناتي مع اللغة الانجليزية ( مش عارفة اية حكاية الذكريات معايا اليومين دول )
زماااااااااااااااااان مش من زمان اوي يعني :D كان اول يوم لي في ثانوي عام في مدرسة السنية ودخلت الفصل ميس فاتن مدرسة الانجليزي وكانت بتتعرف على البنات اللي في الفصل وكانت بتسأل كل واحدة انت كنتي في مدرسة اية في اعدادي و وكان الغالبية من مدرسة السنية الاعدادي الا القليل من مدارس تانية وكنت انا الوحيدة اللي جاية من مدرسة خاصة اول ما قولت لها اسم المدرسة بكل فخر مدرستي بقى وعايشة فيها كام سنة
لقيتها بتقولي اه ايجيبت الخاصة مافيش حد بيجلنا منها بيعرف انجليزي
طاطاطاطاطا وكانت الصاعقة
من يومها وانا علاقتي بالانجليزي انتهت فقدت الذاكرة وصدقت فعلا اني ما بعرفش انجليزي يا نهار ابيض اومال السنين اللي فاتت دي كانت اية عمري راح هدر طب الانجليزي اللي كنا بنتكلمه في الحصة دي اية كان سراب
وبدأت معاناتي مع الانجليزي مع ايمان واعتقاد راسخ اني ما بعرفش انجليزي وانه مش بعد ما شاب ودوه الكتاب كان عندي احساس بالفشل ذريع استمر معايا لسنين طويلة لحد ما تحول لفوبيا بجد ورغم ان درجاتي في ثانوية عامة في اللغات كانت عالية بس بردو استمر الايمان الراسخ اني ما بعرفش انجليزي
ودخلت الكلية قسم لغات شرقية عبري درست فيه عبري وفارسي وحبشي وسرياني وكلهم اصعب من الانجليزي بكتييررررررررررررررررررررر اوي خاصة العبري اللي كنت بتكلمه لبلب واقراه واسمعه واكتبه لدرجة اني كنت بكتب مواضيع تعبير كبيرة بالعبري ده غير الاشعار اللي كنت بدأت أألفها بالعبري كمان ( ايام ما كنت بكتب شعر يعني )
طيب يعني انا عندي استعداد اني اتقن اي لغة تانية حتى لو كانت صعبة بس الفوبيا استمرت
الفوبيا بقى كبرت اكتر لما اتخرجت وبدأت ادور على شغل كل ما اقدم على شغل يقولي كمبيوتر وانجليزي ولا لا بعرف ده وعندي فوبيا من ده
المهم مرت السنين لحد ما في سنة قررت اهزم الخوف اللي جوايا وانتصر على ميس فاتن اللي عششت في دماغي واخد كورس مع اجانب وقد كان وكانت الحوسة الست اللي هتدينا الكورس ما بتتكلمش كلمة عربي ولا بتفهمة اصلا يا دي النيلة طب وبعدين
مع اول انترفيو مع كرستينا (اللي اديتنا الكورس ) لقيت اني في الليفل الخامس وهم 10 ليفلات يعني انا متوسطة مع الاعتبار الخوف والرعب اللي جوايا والايمان الراسخ بعدم القدرة على الكلام او فهم الانجليزي ماكنتش مصدقة نفسي خاصة لما لقيت كرستينا بتمدح في وبتقولي اني تمام وقعدت حوالي سنة في الكورس ده وخلصت كل الليفلات بتفوق ومابنتكلمش كلمة عربي في الكيلاس ( كيلاس يعني ده كيلاس وده كيلاس ودول كيلاسات )
الظريف بقى اني بدأت اجيب روايات انجليزي من سور الاسبكية الرواية بخمسة جنية واقعد مع نفسي في المترو وانا مروحة من الكورس اقرا واترجم من قاموس الياس بتاع الجيب صديقي من ايام ثانوي لحد ما في يوم واحدة ربنا يكرمها كانت قاعدة جنبي لسة بعلم على كلمة وهشوفها في القاموس لقيت الاخت رشقت وراحت قايلة لي معنى الكلمة اتاريها كانت مركزة معايا روحت قافلة القاموس والرواية وما اعرفش هم فين لحد دلوقتي وانتهت علاقتي بالروايات الاجنبية
بس لما دخلتت مجال ال online marketing لقيت ان لازم اقرا كتير وافهم عشان اكون مميزة خاصة اني اخترت تخصص صعب وهو ال seo وده مافيش عرب بيكتبوا فيه بشكل احترافي فكان لازم اقرا مقالات وكتب بالانجليزي وبدأت مع جوجل ترجمة الكلمة اللي تقف معايا اترجمها واكمل
النتيجة
كنت بدي الكورسات بماتريال عربي حاليا الماتريال كلها انجليزي وطبعا انا اللي بجهز الماتريال من عشرات الكتب ومئات المقالات والانفوجرافيكس
واعتقد اني بقى عندي القدرة اني اقف اشرح كمان بالانجليزي طيب اية اللي يخليني اوصل لكدة :
- تخلص من ميس فاتن اللي جواك
- صدق انك تقدر تعمل اي حاجة انت عايزها
-عشان تكون مميز لازم تتعب
-الانجلزي مش بعبع
-اقرأ كتير ،اتفرج على افلام اجنبي كتير ، اكتب انجليزي كتير
-ماتتكسفش انك تغلط لأنك هتتعلم
ما اعرفش الكلام ده ممكن يفيدكم ولا لا بس عموما اللي هيوصل لاخر سطر ده بطل وانا بحييه انه استحمل كل الهري اللي فوق ده
تحياتي لميس فاتن (:D)
بما ان ناس كتير بعتت تسألني عن موضوع عدم اتقان اللغة الانجليزية وتأثير ده على سوق العمل بشكل عام وعلى مجال التسويق وال online marketing بشكل خاص خلوني احكي لكم حكاية صغننه عن معاناتي مع اللغة الانجليزية ( مش عارفة اية حكاية الذكريات معايا اليومين دول )
زماااااااااااااااااان مش من زمان اوي يعني :D كان اول يوم لي في ثانوي عام في مدرسة السنية ودخلت الفصل ميس فاتن مدرسة الانجليزي وكانت بتتعرف على البنات اللي في الفصل وكانت بتسأل كل واحدة انت كنتي في مدرسة اية في اعدادي و وكان الغالبية من مدرسة السنية الاعدادي الا القليل من مدارس تانية وكنت انا الوحيدة اللي جاية من مدرسة خاصة اول ما قولت لها اسم المدرسة بكل فخر مدرستي بقى وعايشة فيها كام سنة
لقيتها بتقولي اه ايجيبت الخاصة مافيش حد بيجلنا منها بيعرف انجليزي
طاطاطاطاطا وكانت الصاعقة
من يومها وانا علاقتي بالانجليزي انتهت فقدت الذاكرة وصدقت فعلا اني ما بعرفش انجليزي يا نهار ابيض اومال السنين اللي فاتت دي كانت اية عمري راح هدر طب الانجليزي اللي كنا بنتكلمه في الحصة دي اية كان سراب
وبدأت معاناتي مع الانجليزي مع ايمان واعتقاد راسخ اني ما بعرفش انجليزي وانه مش بعد ما شاب ودوه الكتاب كان عندي احساس بالفشل ذريع استمر معايا لسنين طويلة لحد ما تحول لفوبيا بجد ورغم ان درجاتي في ثانوية عامة في اللغات كانت عالية بس بردو استمر الايمان الراسخ اني ما بعرفش انجليزي
ودخلت الكلية قسم لغات شرقية عبري درست فيه عبري وفارسي وحبشي وسرياني وكلهم اصعب من الانجليزي بكتييررررررررررررررررررررر اوي خاصة العبري اللي كنت بتكلمه لبلب واقراه واسمعه واكتبه لدرجة اني كنت بكتب مواضيع تعبير كبيرة بالعبري ده غير الاشعار اللي كنت بدأت أألفها بالعبري كمان ( ايام ما كنت بكتب شعر يعني )
طيب يعني انا عندي استعداد اني اتقن اي لغة تانية حتى لو كانت صعبة بس الفوبيا استمرت
الفوبيا بقى كبرت اكتر لما اتخرجت وبدأت ادور على شغل كل ما اقدم على شغل يقولي كمبيوتر وانجليزي ولا لا بعرف ده وعندي فوبيا من ده
المهم مرت السنين لحد ما في سنة قررت اهزم الخوف اللي جوايا وانتصر على ميس فاتن اللي عششت في دماغي واخد كورس مع اجانب وقد كان وكانت الحوسة الست اللي هتدينا الكورس ما بتتكلمش كلمة عربي ولا بتفهمة اصلا يا دي النيلة طب وبعدين
مع اول انترفيو مع كرستينا (اللي اديتنا الكورس ) لقيت اني في الليفل الخامس وهم 10 ليفلات يعني انا متوسطة مع الاعتبار الخوف والرعب اللي جوايا والايمان الراسخ بعدم القدرة على الكلام او فهم الانجليزي ماكنتش مصدقة نفسي خاصة لما لقيت كرستينا بتمدح في وبتقولي اني تمام وقعدت حوالي سنة في الكورس ده وخلصت كل الليفلات بتفوق ومابنتكلمش كلمة عربي في الكيلاس ( كيلاس يعني ده كيلاس وده كيلاس ودول كيلاسات )
الظريف بقى اني بدأت اجيب روايات انجليزي من سور الاسبكية الرواية بخمسة جنية واقعد مع نفسي في المترو وانا مروحة من الكورس اقرا واترجم من قاموس الياس بتاع الجيب صديقي من ايام ثانوي لحد ما في يوم واحدة ربنا يكرمها كانت قاعدة جنبي لسة بعلم على كلمة وهشوفها في القاموس لقيت الاخت رشقت وراحت قايلة لي معنى الكلمة اتاريها كانت مركزة معايا روحت قافلة القاموس والرواية وما اعرفش هم فين لحد دلوقتي وانتهت علاقتي بالروايات الاجنبية
بس لما دخلتت مجال ال online marketing لقيت ان لازم اقرا كتير وافهم عشان اكون مميزة خاصة اني اخترت تخصص صعب وهو ال seo وده مافيش عرب بيكتبوا فيه بشكل احترافي فكان لازم اقرا مقالات وكتب بالانجليزي وبدأت مع جوجل ترجمة الكلمة اللي تقف معايا اترجمها واكمل
النتيجة
كنت بدي الكورسات بماتريال عربي حاليا الماتريال كلها انجليزي وطبعا انا اللي بجهز الماتريال من عشرات الكتب ومئات المقالات والانفوجرافيكس
واعتقد اني بقى عندي القدرة اني اقف اشرح كمان بالانجليزي طيب اية اللي يخليني اوصل لكدة :
- تخلص من ميس فاتن اللي جواك
- صدق انك تقدر تعمل اي حاجة انت عايزها
-عشان تكون مميز لازم تتعب
-الانجلزي مش بعبع
-اقرأ كتير ،اتفرج على افلام اجنبي كتير ، اكتب انجليزي كتير
-ماتتكسفش انك تغلط لأنك هتتعلم
ما اعرفش الكلام ده ممكن يفيدكم ولا لا بس عموما اللي هيوصل لاخر سطر ده بطل وانا بحييه انه استحمل كل الهري اللي فوق ده
تحياتي لميس فاتن (:D)
