الأحد، 30 مارس، 2014

انا اتشتمت في الانترفيو يا سعاااااااد

قررت اعمل قسم جديد على المدونة اسمه مش تسويق هكتب فيه مقالات يمكن تبعد او تقرب من التسويق لكن في النهاية هو كلام سر جوايا وما بقولوهش لحد غير ليكم بس
  
 عايزة احكيلكم على موقف حصل معايا من كام سنة كدة كنت سبت شغلي وبدور على شغل تاني وجتلي فرصة في حازم حسن ورحت عملت اختبارات وعديت منهم وجه وقت الانترفيو الاستاذة المحترمة اللي عملتلي الانترفيو تقريبا ما عملتليش انترفيو ودي كانت تاني مرة اروح المشوار ابن الاية ده وبصراحة زحلقتني ومش بالذوق فأنا قولت هي كدة كدة بايظة افهم بقى هي عملت كدة ليه 






الاستاذة وقتها قالت عايزة تعرفي انا رفضتك ليه لأن مافيش حد يكتب cv بالحمق ده اي والله قالتلي كدة بالحمق ده طبعا انا ذهلت وبرأت وعنيه احولت حمق الكلمة دي بجد ولا حقيقة المهم كان اية اعتراضها على ال cv بقى 
اولا انت مش موحده الفونت في الحجم ولا نوع الفونت نفسه وكنت كاتبه معلومة قبل معلومة تانية 

بس 
اه وربنا بس مع اني ساعتها كان عندي خبرة معرفش كام سنة ومهارات وكورسات ودنيا ده بالنسبة للcv وطبعا ماكنتش رايحة فورمال ودي كانت غلطة الصراحة انا نفسي مش عارفة اغفرهالي لحد دلوقتي 
نرجع بقى للسي في يعني انا تقريبا اتشتمت واتهنت عشان مش كاتبه الفونت واحد اومال بقى لو كنت كاتبه لها cv فيه الوان ولا عاملة لها تصميم خزعبلي ولا حاطة صورتي في النادي زي ما البعض بعتلي كانت عملت في اية رمتني من الدور العشرتاشر مثلا 
طب انا بحكي الذكريات الأليمة دي ليه 
عشان في سيفيهات كتيرة جتلي الصراحة كانت فيها حاجات مش مظبوطة زي استخدام الألوان مثلا وعمل زخارف وكرانيش وتصميمات في السي في وفي صور مش فورمال (في النادي ) وبناءا عليه اصدقائي في الكفاح حبيت انبهكم انك ممكن تقابل حد زي الاستاذة اللي شتمتني دي وممكن ما تقولكش اية السبب فانا قولت اقولكم بدل ما تتحطوا في الموقف السخيف ده زيي 
بالمناسبة كان احساس منيل بنيلة اوي يومها يالا هيروحوا من ربنا فين 

عموما لو عايز تعمل سيرة ذاتية احترافية ممكن تشوف الموقع ده هيساعدك كتير 


مش هقولك اعمل شير وفيد الناس بس انا هسيبها للبني ادم الطيب اللي جواك اللي عايز يفيد الناس