السبت، 19 أبريل، 2014

إزاى أقدر أتفوق فى السوق؟

الأسطورة بتقول إن فيه 3 عوامل أساسية بتحدد مكانك فى السوق اللى إنت شغال فيه، والعوامل دى هى اللى ممكن تحول الـAudience اللى فى الـSegment أو الفئة اللى إنت شغال عليها لـCustomers حقيقيين يشتروا المنتج بتاعك، لازم تشتغل على الـ3 عوامل دول وتهتم بتحسينهم وإظهارهم للناس بشكل جيد.





كالعادة زى كل مرة، قبل ما نبدأ ركّز كدة وهات ورقة وقلم عشان لو فيه أى سؤال جه فى دماغك وإنت بتقرأ إكتبه فى ورقة وبعد ما تخلص قراية إكتبه فى كومينت وهاجاوبك عليه إن شاء الله  :)


الـ3 عوامل دول هما:
1. الـOperational Excellence: الجزء ده بيتضمن فى الأساس سعر المنتج أو الخدمة، و كمان جودة خدمة العملاء عندك، وخدمة ما بعد البيع، والتسهيلات اللى بتديها للعميل عشان يشترى من عندك. هنا العميل بيبقى مستريح جدًا فى التعامل مع المنتج والشركة، لإن المنتج رخيص، وبيلاقى خدمة كويسة من الشركة سواء خدمة عملاء أو خدمة ما بعد البيع، كمان بيوصل للمنتج بسهولة. مثال على كدة العربيات الصينى، سعرها رخيص، وقطع غيارها متوفرة، وكمان ليها مراكز خدمة منتشرة وكويسة.

2. الـPerformance Superiority: فى الجزء بتاع الـPerformance بنتكلم عن شكل المنتج، وجودته، والـStyle بتاعه، والتكنولوجيا اللى بيوفرها للعميل. مثال على كدة العربية الـMercedes أو الـBMW، عربية فخمة جدًا، جودتها ممتازة وبتدى للعميل تكنولوجيا متقدمة.

3. الـCustomer Intimacy: هنا بنتكلم عن الـCustomization، أو قد إيه المنتج بتاعك مناسب لإحتياجات العميل، إزاى يكون المنتج بتاعك متفصل على إحتياجات كل عميل. هنا العميل بيحس إن الشركة بتتعامل معاه على إنه شخص مميز جدًا، وبتوفرله كل إحتياجاته، وبالتالى هيبقى فيه علاقة مودة بيها وبين المنتج والشركة ومش هيفكر يروح لشركة تانية أبدًا. مثال على كدة شركة Rolls-Royce اللى بتتيح للعميل إنه يفصل العربية بتاعته زى ما هو عايز.


بعد ما عرفنا الـ3 عوامل الأساسية اللى بيحددوا مكان أى منتج أو خدمة فى السوق، دلوقتى هنعرف مع بعض إيه هى الخطوات اللى تقدر تبنى بيها الإستراتيجية اللى تحدد مكانك فى السوق:

- الخطوة الأولى: طبعًا كل منتج أو خدمة ليها خصوصيتها، عشان كدة أهم حاجة إنك تحدد إيه هى الحاجات اللى بتأثر فى الـ3 عوامل اللى فوق دول بالنسبة السوق اللى إنت شغّال فيه. والحاجات دى بتقدر تحددها عن طريق إنك تشوف الـCustomers أو العملاء ممكن يكونوا متوقعين إيه، وتشوف كمان المنافسين بتوعك بيشتغلوا إزاى، وكمان بتشوف المعلومات اللى إنت طلعت بيها من الـMarket Research، وتحاول تحلل كل ده وتطلع بنتيجة.

- الخطوة التانية: فيه فى السوق حاجة إسمها Fair Value، اللى هى المتوسط اللى العميل متوقعه فى كل حاجة من الـ3، يعنى مثلًا متوسط السعر اللى العميل عنده إستعداد يدفعه، وكمان الجودة اللى متوقعها، وأخيرًا الـBenefits أو الحاجات اللى متوقعها من المنتج ده. كل ده متوسطه إسمه الـFair Value. لازم تحدد إيه هى الـFair Value فى كل عامل من العوامل التلاتة. خلّى بالك إن الـExpectations أو توقعات العملاء بتتغير مع الوقت، عشان كدة لازم تتابع دايمًا التغييرات دى عشان متلاقيش نفسك برة السوق من غير ما تحس.

- الخطوة التالتة: العميل لما بييجى ياخد قرار الشراء، بتحصل جوة عقله Process صغيرة كدة بيقارن بيها كل المنتجات اللى قدامه على أساس الـ3 عوامل دول. كل عميل بيبقى محتاج المنتج يبقى عند الـFair Value فى عاملين من الـ3، وفوق الـFair Value فى العامل التالت، وده بيختلف من عميل للتانى على حسب الـPersona أو الشخصية اللى إنت بتستهدفها. لازم توصل للـFair Value دى فى عاملين من التلاتة، وتكون متفوق فى العامل التالت، وبكدة هتقدر تشد إنتباه الـCustomers المهتمين بالعامل اللى إنت متفوق فيه.

حاجة مهمة جدًا، إوعى تحاول تتفوق فى الـ3 عوامل لإن ده مستحيل، هتلاقى نفسك فى الآخر عند الـFair Value فى الـ3 ومش قادر تشد إنتباه أى نوع من الـCustomers.

بعد ما تخلص الـ3 خطوات دول هتلاقى نفسك قادر بكل سهولة تعمل Strategy تشتغل عليها فى السوق، وهتلاقى نفسك كمان قادر تقيس نجاحك فى السوق بناءًا على العوامل دى بكل سهولة.

لو عندك أى أسئلة، إكتبها فى كومينت وهاتشقلب واجاوبك عليها ان شاء الله :D


كتبها: محمد أمين