الثلاثاء، 1 يوليو، 2014

الفرق بين الحلم والهدف

ناس كتير بتقولي انها تايهة ومش لاقية طريقها فاسالهم هو انت عايز تبقى اية او توصل لفين يقولي انه بيحلم يبقى كذا اقوله طب وهدفك يقولي ايوة مانا بقولك بحلم ابقى كذا 

في فرق كبير بين ان يكون عندك حلم وبين ان يكون عندك هدف 




الحلم هو شيء كبير مالوش سقف وممكن يتحقق وممكن لأ يعني مثلا حلمي ان يكون في سلام في العالم ده حلم ، حلمي ان يكوني اكون غني ، حلمي اني اكون مشهور دي امثلة على احلام البعض طب والهدف ؟

الهدف هو شيء محدد عايز توصله بتربطة بوقت محدد يعني بتقول انا هدفي بعد تلات سنين يكون عندي شركة في مجال كذا ، او بعد خمس سنين هكون اتخرجت ، بعد سنة هكون اخدت ترقية في شغلي 
المهم بقى انك لما بتحدد انت عايز تعمل اية بالظبط وتحدده بمده بتعمل خطة عشان تحقق الكلام ده ماهو مش وانت قاعد على الأريكة ( حلوة الاريكة دي الكنبة يعني  ) تقول والله انا هترقى في شغلي وانت نايم في بيتكم انت ساعتها هتترقى فعلا بس هتترقى خالص من الشركة وتبقى رئيس مجلس ادارة بيتكم 
هدف يبقى خطة عمل واضحة ومحددة المعالم ولها خطة بديلة ويكون فيها مرونة عشان لو في حاجة مانجتش تلحق نفسك بفكرة تانية بديلة او خطة تانية بديلة تؤدي لنفس الهدف 
طب انا مش عارف اعمل هدف لنفسي ؟
هقولك فكر في النتيجة اللي انت عايز توصلها في الاخر خالص يعني مثلا عايز ابقى ناجح
طيب اسأل نفسك هو انا ممكن ابقى شخص ناجح في اية 
شوف انت مميز في اية ، اية اكتر حاجة انت بتحبها ولو اشتغلت فيها هتتقنها اوي وتنجح فيها جدا وتبقى اكتر شخص مميز فيها وبعدين ابدأ شوف هو انا عشان اوصل للنجاح ده في المجال ده مثلا محتاج اية وجهز نفسك لده حط اول هدف انك في خلال فترة محدده تكون اخدت كورسات ، قريت ، اتعلمت ....... بعد كدة هدف تاني اخد دورات تدريبية في شركات كذا وكذا ...... بعد كدة هدف تالت اني اشتغل في المكان الفلاني وهدف رابع اني اكون مدير الشركة وهكذا ......
بس كدة بقوا مجموعة اهداف ؟
مظبوط زمان درسنا في مادة الاقتصاد في الثانوية العامة ان الانسان عبارة عن مجموعة من الرغبات كل ما يحقق رغبة بيلاقي رغبة جديدة ظهرت والرغبات دي انت بتحولها لاهداف وتحققها فمش معنى انك وصلت لهدف يبقى خلاص تأنتخ على الاريكة بردو انت طول الوقت محتاج تشتغل وتحقق اهداف وتنجح فيها وتحقق اهداف تانية او تخفق فيها وتحاول من جديد 
المهم لازم يبقى عندك هدف واضح الملامح وصريح مش مجرد حلم لازم يبقى ليك طريق واضح ماينفع تنزل من بيتكم مش عارف هتروح فين وتركب اي حاجة فهتلاقي نفسك في اي حته حدد قبل ما تنزل انا رايح فين وهوصل في قد اية وقت وهركب مواصلات اية عشان اوصل للمكان اللي انا عايزة 
بس خلاص 
صباحكم بيضحك كده