الخميس، 10 يوليو 2014

ازاي تكوني socialite


الجواز على طريقة ال Marketers  4 - 
 ازاي تكوني socialite 

 اتأخرت عليكم شوية انتوا عارفين رمضان بقى والصيام والفصلان والعزومات والذي منه 
المهم هنكمل كلامنا النهاردة عن الجزء الرابع من ازاي تتجوز على طريقة ال Marketers والكلام بردو للبنات المرة دي مش عايزة اشوف ضل User راجل في قلب المقالة وخلوا بالكم انا شيفاكم وبراقبكم وهراقبكم ( روز شركة المرعبين المحدودة ستايل )
المرة دي هنتكلم ازاي تكوني socialite 


Add caption



زي مانت عارفة ان الحياة الاجتماعية لها تأثير مهم في الظهور في محركات بحث العرسان 
ازاي تكوني اجتماعية يعني تتواصلي مع الناس اللي حوليكي في المجتمع بس زي ما قولنا المرة اللي فاتت انت Brand ولازم تتعاملي على هذا الاساس يعني مش عشان اكون اجتماعية اضحك هنا واهزر هنا واكلم اللي اعرفه واللي ما اعرفوش لا خليكي Brand عارف هو بيكلم مين وازاي وامتى 

- حاولي تعرفي انماط الناس اللي بتتعاملي معاهم عشان تعرفي تتعاملي صح يعني مثلا في شخص هتلاقية زي تويتر كلامه قليل ويحب المختصر المفيد خير الكلام ما قل ودل وفي حد تاني ماينفعش تتكلمي معاه في التليفون عشان مش هيفهمك فلازم يكون شايفك قدامه زي موقع يوتيوب اما الشخص بقى اللي بيحب يرغي كتير زي الفيسبوك وجوجل بلس فحاولي تقنني علاقتك معاه ويبقى بردو الكلام في الحاجة المفيدة مش رغي وخلاص لأن كل ده هيضرك انت كبنت اولا وكبراند ثانيا 

- لازم تعرفي هتقولي اية لمين مش اي حد يتقاله كل الكلام قسمي الناس على حسب سنهم ، طبقتهم الاجتماعية ، وظيفتهم ولكل مقام مقال اكيد مش هتتعاملي مع مديرك في الشركة زي ما بتتعاملي مع زميلتك في المكتب كل واحد وله طريقة في التعامل اعملي customization  للناس  وكلمي كل واحد بطريقة تليق بيه 



- لازم تقيمي علاقتك بالناس من فترة للتانية لأن بناءا على تقييمك للعلاقات هتقدري تفهمي مين اللي فعلا مهتم بيكي ومين اللي مش مهتم وبيضيع وقت 


- خاطبي الناس بلغتهم يعني لو حد كلمك بالعربي كلميه بالعربي ، حد بيكلمك بالانجليزي اتكلمي انجليزي ، حد بيكلمك Mix  شوية عربي على شوية انجليزي اعملي كدة بس المهم انك في نفس الوقت بتحافظي على الهوية بتاعتك وشخصيتك ك Brand  

- خليكي دايما مطلعة على الاحداث الجارية اعرفي اية اللي بيحصل حوليكي وشاركي الناس فيه مش من باب الرغي وخلاص لأ عشان يكون عندك ثقافة بكل اللي بيحصل حوليكي يعني في كاس عالم اعرفي اية الفرق اللي بتلعب مين كسب مش لازم تقعدي تتفرجي على الماتش بس عشان لما حد يقولك مثلا الماكينات الألمانية طحنت البن البرازيلي تبقي فاهمة ان مثلا ألمانيا غلبت البرازيل سبعة واحد في اخر ماتش المهم بقى ما تبينيش انت بتشجعي مين خليكي ذكية تلات حاجات ممكن يخلوكي تخسري الناس الكلام في السياسة والكورة والدين لكن مهم انك تكوني على دراية باللي بيحصل حوليكي 

germany vs brazil
germany vs brazil


- اسمعي للناس اللي حوليكي اعرفي آراءهم واوعي تخسري حد عشان رأي او تكوني متعصبة لرأيك لأن في النهاية الرأي وارد يكون صح او غلط الموضوع نسبي فلازم تقبلي رأي الاخر حتى لو الرأي ده مختلف معاكي وممكن يكون رأي ينتقد تصرف ليكي بلاش تأوحي وتتعصبي اسمعي وافهمي لأن ممكن اللي قدامك يكون صح طالما بيقول رأيه بشكل محترم استفيدي من الرأي ده ولو عندك مشكله في تصرفاتك فعلا حاولي تغيريها 

- شاركي الناس اهتماماتها يعني لما تلاقي صاحبتك بتحضر للجواز انزلي اشتري الحاجة معاها ، واحدة من اصدقاءك تعبانة زوريها واطمني عليها وهاتي لها ورد  ، حد عنده لاقدر الله مشكلة اقفي جنبه خليكي دايما مع الناس اللي حوليكي وحسسيهم بمشاركتك الايجابية معاهم وانك حاسة بيهم وبتشاركيهم حياتهم فعلا 

- حددي اوقات تكوني فيها اجتماعية يعني ما تفضليش طول الوقت رغي رغي رغي مع الناس قنني الموضوع وخليكي عارفة امتى تتكلمي مع الناس امتى الوقت اللي الناس فعلا تهتم بالكلام اللي بتقولية 


- المهم بقى الكلام اللي بتقوليه مع الناس خليكي اجتماعية بشكل مفيد كل ما كنتي بتساعدي اللي حوليكي اولا هيهتموا باللي بتعمليه ثانيا هيحبوا اللي بتعمليه ثالثا هيساعدوكي في اللي انت بتعمليه 

- اهتمامك بمظهرك شيء اساسي مش لازم البهرجة كل ما كنتي بسيطة بس شيك كل ما كان ده افضل ، خليكي دايما أنيقة ، مختلفة ، مميزة ، مبهرة معظم الناس بتاخد بالمظاهر المهم ما تخدعيش حد خليكي طبيعية ومختلفة في نفس الوقت  

دي كانت اهم النقاط اللي ممكن تساعدك تكوني اجتماعية ويحبب فيكي الناس ويخليهم يقربوا منك وبكدة فرصتك في انك تظهري في محركات بحث العرسان هتكون اكبر 



لو فاتتك اول 3 مقالات هتلاقيهم على الروابط دي 







هذه المقالات ماهي الا عبارة عن شرح ال Online Marketing  بشكل مختلف 
#عايز_تنجح_ساعد_غيرك_ينجح
#marketing_على_طريقتي