الاثنين، 14 يوليو، 2014

الدليل الساطع على مصادر زيارات جريدة المصري اليوم

عنوان في جريدة الوطن اليوم 
عقب قفزها إلى قائمة الأكثر زيارة.. محررة "اليوم السابع": "المصري اليوم" تشتري زيارات وهمية ومعي المستندات
 المصري اليوم وغيرها بيشتروا ترافيك وهمي من مواقع بتبيع زيارات وهمية للمواقع عشان يرتفع الترتيب في موقع أليكسا ويبان انه موقع له زيارات كبير وده بيخلي سعر الاعلانات على الموقع تزيد ده على حد قول الوطن واليوم السابع انا ماليش دعوة 
اية بقى الحكاية ، بعد البحث والتحليل اكتشفت الآتي : 

قوم اطمن على فلوسك

أولا خليني اعرفكم بموقع Alexa
ده موقع إحصائي للمواقع بتقدر من خلاله تعرف ترتيب الموقع بتاعك محليا وعالميا وبيعتمد في ترتيب المواقع على الترافيك او عدد الزيارات اللي جاية للموقع بصرف النظر الترافيك ده مصدره اية بالظبط وتقدر من خلاله تشوف احصائيات تانية عن الموقع ولو بصيت على اول 100 موقع في مصر هتلاقي ان المصري اليوم محتل المرتبة رقم سبعة واليوم السابع محتل المرتبة رقم تمانية بعد ما كان في الترتيب السابع فترة طويلة جدا بس نقول اية دوام الحال من المحال 

المصري اليوم في اليكسا
المصري اليوم في اليكسا 


 المهم ان أليكسا مش دقيق في عدد الترتيب بتاعه لية لأنك ممكن تشتري ترافيك وهمي من المواقع اللي بتبيع زيارات وبردو تطلع في اليكسا وتحتل المراتب الاولى و ده بيحصل من بعض المواقع فعلا و عشان كدة عمالة انبح في صوتي واقول لما تيجي تاخد مساحة اعلانية في اي موقع اليكسا مش مقياس ابدا في مقاييس تانية كتير مطلوب منك تسأل عنها قبل ما تعمل اعلان على موقع زي مثلا مصادر الترافيك زي
Organic Search
Social
Avg. Session Duration
Bounce Rate
Pageviews
New Visitor, Returning Visitor
ومهم انك تعرف اية مواقع ال Referral عشان تتأكد ان مافيش ترافيك وهمي
كمان مهم انك تعرف ال Page Authority , Domain Authority
اليكسا مش مقياس
اليكسا مش مقياس
اليكسا مش مقياس انك تقرر تعمل اعلان على موقع او ان اللي بيرانك في اليكسا في الاول هو يبقى اجمد حد 

نرجع بقى للمصري اليوم هل هو فعلا بيشتري ترافيك ولا لا 
باستخدام بعض الادوات التحليلية زي similarweb  مثلا وهو غير دقيق مائة في المائة لقيت ان اولا نسبة الترافيك بتاعة المصري اليوم حوالي  من 13 ل15 مليون زائر في الشهر ممكن النسبة تزيد او تقل ده تقريبيا و ان خلال التلات شهور اللي فاتوا نسبة الترافيك الاكبر جاية منين ؟
جاية من السوشيال ميديا زي ما هو باين كدة في الصورة 


وزي ما هو واضح ان اكتر من نص الترافيك جاي من السوشيال ميديا  والربع بيدخل الموقع مباشرة و حوالي 7.5% من  referrals  وهي المواقع اللي بيكون فيها لينكات للموقع ممكن بقى تبقى مواقع بيع زوار او مواقع تانية ناشرة حاجات وحاطة لينك بيودي على المصري اليوم المهم قولت بردو ابحث في موضوع ال referrals  وفعلا في بعض مواقع بيع الزيارات وان كانت النسبة مش كبيرة مش هي اللي تعمل الفرق الفظيع ده في الترافيك وكمان ممكن تكون حاجات قديمة استخدموها 


تعالوا بقى نبص بصة على السوشيال ميديا بتاعتهم على فيسبوك وجوجل بلس 

المصري اليوم على الفيسبوك 



المصري اليوم على جوجل بلس
اما الزيارات عن محركات البحث فهي حوالي 13% تقريبا مافيش حد مسئول عن ال Seo  عندهم وده مهم جدا ممكن يعملهم ترافيك اكتر بكتير من السوشيال ميديا 

زيارات المصري اليوم من محركات البحث
وبكدة سيداتي انساتي سادتي ظهر بالدليل القاطع والبرهان الساطع ان المصري اليوم زيادة معدلها في اليكسا اللي هو اصلا مش مقياس يعتد به ان معظم الزيارات من شغل السوشيال ميديا 
هم بقى بيقدموا اية على السوشيال ميديا دي حاجة تانية اتفق او اختلف مع اللي بيقدموه بس واضح ان الترافيك الزيادة من شغل الفيسبوك وتويتر وجوجل بلس 

ممكن يكونوا بيستخدموا الزيارات الوهمية بنسبة قليلة او كانوا بيستخدموها والحمد لله ربنا تاب عليهم المهم اللي عايز يتأكد يدخل على اي موقع احصائي ويشوف ده بنفسه 

ده ما يمنعش ان في ناس كتير بوابات وجرائد وغيرها بيستخدموا طرق غير مشروعة للظهور برانك اعلى عشان يخدعوا المعلنين ويرفعوا من سعر الاعلانات عشان كدة لو قررت تعلن في جريدة او موقع الكتروني اسأل عن الحاجات اللي قولت لك عليها فوق هي الاهم وسيبك من أليكسا خالص كترتيب بس ممكن تستفيد من أليكسا في حاجات تانية هبقى اقولكم عليها بعدين في مقالة خاصة عشان ما تتلخبطوش 
وقوم اطمن على ألكيسك :D

ودي مقالة الوطن اللي اتكتبت عن الموضوع ده وبتتهم فيه المصري اليوم بأنها بتجلب زيارات وهمية 


وزي ما بيقولوا ادي العيش لخبازة مش اي حد يقول اي كلام ونصدقة واعتقد ان المصري اليوم لو حبت تطلع احصائيات موقعها مش هيكون ابعد من اللي تم ذكره فوق 
طيب انا لية بقول كل الكلام ده هو انا بشتغل مع المصري اليوم ؟ انا ولا بشتغل مع المصري اليوم ولا حتى بقرأ جرايد خالص لا الكتروني ولا ورقي بس الفكرة كلها ان لما بلاقي معلومات غلط بتتقال في المجال بتاعي بحب ابحث عن مدى مصداقيتها مش اكتر 
بس خلاص